港式台牌入門
由零開始。睇完呢頁，就可以落 港式台牌 同電腦打一鋪試下。
先講清楚：麻雀每張枱規矩都唔同。呢頁嘅番數同規矩，跟嘅係港式台牌 app 嘅預設枱規；你嗰枱唔同，就以你嗰枱為準。全部番種可以喺 番數表 度查。
一、港式台牌係邊一種麻雀
十六張牌嘅打法，一副 144 隻。好多人以為佢等於台灣麻將 —— 張數一樣、牌一樣，但計分係兩個系統。
所以聽人講「幾多台」，嗰個通常係台灣麻將；港式台牌講嘅係「幾多番」。
二、一副牌入面有咩
- 數牌 —— 萬、筒、索三門，每門一至九，每款四隻，合共 108 隻。
- 字牌 —— 東南西北、中發白，每款四隻，合共 28 隻。字牌冇連號，只砌得刻子同眼。
- 花牌 —— 春夏秋冬、梅蘭菊竹，每隻得一張。
花唔計喺十六隻手牌入面。摸到就即刻反開擺埋一邊，喺牌尾補一隻返嚟。每隻花都有番。
三、砌成點先叫食糊
- 順子 —— 同一門三隻連號，例如四五六筒。
- 刻子 —— 三隻一模一樣，例如發發發。
- 槓子 —— 四隻一模一樣，要開咗槓先算。
- 眼 —— 一對，每副牌淨係要一對。
食糊 = 五組 + 一對眼。手上十六隻，加食糊嗰隻，啱啱十七隻。
另外有三個特殊牌型：嚦咕嚦咕、十六不搭、十三么，唔跟五組一對嘅形，番數表有解釋。
四、一鋪牌係咁行
- 四家坐埋，一家做莊（東），其餘逆時針係南、西、北。
- 每家十六隻，莊家多一隻，由莊家打第一隻。
- 之後逐家摸一隻、打一隻。摸到花就補。
- 有人食糊就完；牌摸晒都冇人食，叫流局。
睇到呢度已經可以打。免費同電腦打一鋪，唔識嘅位個 app 會提你。
五、上、碰、槓、食糊
人哋打出一隻牌，你可以叫出嚟攞：
- 上 —— 同手上兩隻砌順子。淨係上家打嗰隻先上得。
- 碰 —— 你有一對，攞嚟砌刻子。邊家打都得。
- 槓 —— 你有三隻，攞第四隻。邊家打都得。
- 食糊 —— 嗰隻啱啱係你要嘅。
幾家爭同一隻就排隊：食糊 > 碰／槓 > 上。
上咗或者碰咗嘅牌要亮出嚟擺喺門前，咁就唔再算門清 —— 好多大番種要門清先計，所以碰同上唔係免費。
過水：一隻食得嘅牌你放咗過去，之後食糊都食唔得，要自己摸到一隻食唔到糊嘅牌先解。碰就淨係同一隻牌：放過二萬，再有人打二萬先碰唔得，摸牌就解。
食換：啱啱攞入嚟嗰隻唔可以即刻打返出去。碰咗東就唔打得東；用六七筒上咗八筒，五筒都唔打得。
六、槓，同槓嘅代價
- 暗槓 —— 四隻都喺自己手。
- 加槓 —— 碰咗之後摸到第四隻。
- 大明槓 —— 手上三隻，人哋打出第四隻。
開槓要喺牌尾補一隻再打。補嗰隻啱啱食糊，就係槓上開花（番數表叫「槓上自摸」），有額外番。
搶槓：人哋加槓嗰隻啱啱係你食嘅，可以搶嚟食，當佢出銃。暗槓一般搶唔到，只有十六不搭同十三么搶得，而且要已經叮咗。
七、叮 —— 講定你聽牌
差一隻就食糊叫聽牌。呢個時候可以宣佈叮，即刻多番：聽牌 5 番；門清嘅話係門清大叮底 20 番。
代價係隨摸隨打 —— 摸咩打咩，唔可以再換牌，亦唔可以再碰、上、開槓，淨係食得糊。
手上已經食得糊就唔可以叮：叮咗隨摸隨打，放過一次糊就過水，等於永遠食唔到。
八、食糊嘅兩種方法
- 自摸 —— 自己摸到。三家每家計一份。
- 食出銃 —— 食人哋打出嗰隻。打出嗰個一個人孭晒。
所以出銃係最貴嘅錯。一隻牌畀兩三家同時食得，叫一炮多響，大家一齊食。
九、花都食得糊
- 八仙過海 —— 一家齊晒八隻花，即刻食糊。
- 七搶一 —— 一家有七隻花，第八隻喺另一家手，可以搶嚟食糊。
十、點計番
以下係港式台牌 app 嘅預設數字，唔同枱會唔同。
台面見到嘅就係番數，冇上限，逐項加埋就係。
- 底都係一項番（5 番），已經計咗入去。
- 暗槓、獎骰、罰骰呢類「即收即賠」唔跟副牌計，一發生就即刻位位計。
食糊嘅番數唔會即刻埋數。港式係將你同嗰家之間嘅數拉落下一鋪：再贏同一家就越拉越大；俾佢反贏，就劈一半。想清數，隨時可以叫找數。呢個係港式台牌最緊要嗰味。
一百幾個番種逐個查：港式麻雀番數表。
十一、連莊拉莊
莊家食糊就繼續做莊，連莊數加一。連 N 莊嗰家每鋪額外計 2N+1 番，而且兩邊都計：佢贏，每家多計；佢輸，佢一樣多計。
啱啱做莊、未連過（連 0 莊）都計 1 番；連 1 莊 3 番、連 2 莊 5 番，連 5 莊已經係 11 番。流局一定連莊。
十二、一鋪、一圈、一將
- 莊家食糊或者流局 —— 連莊。閒家食糊 —— 過莊。
- 四家各做一次莊為之一圈。
- 港式台牌 app 係東南西北四圈做一將；有啲枱打到南圈就收，開枱前講定。